شوف كيف الذل
ساق من ساق الهوى قبلتٌه مكه جاء يصلي
كل ما وفى فروضه جت مَع فروضه نفيله
جال فيني ما جعلني في مجالاته مجلي
باعذب ابيات الكلام اللي ينومس حين قيله
ويالحكيم اللي بحكمك تلزم العٌيال دلي
كل عاتي ما يهاب الموت طايع ينحنيله
شوف كيف الذل ذل اللي عزيز مايذلي
لين ذل اللي عزيز وصار من عزه ذليله
عزت الروس العزيزه كل راس ماستذلي
فعلها المحمود فعل بالدليل وبالدليله
من جحد كف الكريم اللي كفوفه تستهلي
عن قلوب فالعمى تبصر عطاياها قليله
غيرمن يلقى الضلال اللي بضله يستظلي
مد ما تلقى وراه من الكلام اية رذيله
والمعاني طٌاوعت هوجاس منهي ماتملي
مثل ما برق الحيا هلت مُنه مزن المخيله
استفيق من العذوبه فالقصيد ان جيت كلي
وابدع ابيوت الثبوت بكل فضل من الفضيله
يهجس الهوجاس من هجس الهواجيس ان زهلي
هجس هوجاس هجسه القلب من هوجس عميله
اعذب ابيات القصيد اللي تحاكي وصف خلي
ما تحاكيها الوصوف ولا تمثلها المثيله
مر يغديني دلال ومر يغديني تغلي
لين نهديه المعاني فالبيوت اللي جزيله
الغلا يا اهل الغلا به سوق حد اهل التغلي
الشراء والبيع بالميزان والكيل و مكيله
ارجهن الخافق اللي ما يضيق ولا يزلي
ما تزل من الخلل رجليه فالممشى ثقيله
كان ضاع الحق عند الاقربين يضيق كلي
لين ما ضيقي يفصل لي كفن مثل القتيله
من درج با اقدام رجلينه لمدراج التخلي
ما عليه اليا درج في مدرج اللي جاء قبيله
نرعي اصحاب العقود اللي عقايدها تحلي
غير عقد اهل العقود اللي عقدها مستحيله
شايشه لاني عقدت العقده اللي ماتفلي
اعقد عقود نثلها من مثيل اللي مثيله
والله اللي عزته بالحق في يني تجلي
ما اخضع الا له عزيز الجاه وادعي والتجي له
- منوه
