خيالك نديمي

هلا مرحبا بك يا مجدّد نشاط الروح

يموت الخفوق ولا سمع صوتك أحييته

أهيم بغرامك مع صدى صوتك المبحوح

على الهاتف اللِّي تالي الليل دقيته

ترى قبل ما تزهم خيالك يجي ويروح

إلى راح ناديته ولي رد ضميته

خيالك نديمي.. سلوة الخافق المجروح

يجيني يسامرني إلى منّك أمسيته

على طيفك أشكي لوعة الخافق المذبوح

أبي منه يهدي لك مثل مالي أهديته

من الظلم أنا أسهر يا عيوني بلا مصلوح

ومن العدل تسعد خافقي مثل ما اشقيته

حلاة الغلا محمول روحٍ تعانق روح

متى ما هتف قلبي وناجاك ناجيته

تمر الليالي مثل حلم الكرى وتروح

متى ما فقدت أحلى شبابك تمنيته

- الشاعر/ عبدالله السياري