ناموس الرجال
الهواجس تشغل الفكر ويطول المجال
والشعر ما جمله بالعيون الا احسنه
كل من ينقش حروفه على صم الجبال
ما تغطيها الذواري ومر الازمنة
القصايد عزها في معانيها الجزال
مستواها يرتفع والنتايج مثمنة
تسحر عقول العوارف من السحر الحلال
معهم اصداها تردد على طول السنة
والحقيقه كل من يارد العد الزلال
يرتوي والغاية اللى نواها ممكنة
كم تعلمنا واخذنا الدروس من الليال
لاكفتنا شرها خيرها ما نضمنه
نعقد الامال بالله ومددنا الحبال
والرجا باللي يمد النفوس المحسنة
ندري ان الصبر والطيب ناموس الرجال
ما ظهر من طيبها يعكس اللي تبطنه
المواقف تظهر اصحابها في كل حال
وكل شخص يبين وقت الشدايد معدنه
من تشرف وقفته للعرب مضرب مثال
ومن تردى علته في ضميره مزمنة
قيمة الرجال بالطيبات من الخصال
ما تقومها المدايح بروس الالسنة
الحقايق بينها فرق عن ضرب الخيال
والخلايق من يترجم كلام ٍ ترطنه
الصواب يدوم والزيف ما حوله كمال
تدرج الدنيا رحاها عليه وتطحنه
ما بني لله يبقى وغيره للزوال
وما خفا لابد وقته يدور ويعلنه
والله ان العقل نعمة وعز وراس مال
والموفق عمره لطاعة الله يرهنه
أحمد سعود الحمد - الزلفي
