بقايا عشق
تعبت وضاق بالي والليالي ما قضت لي نوب
ليا حسبتها دار الزمان ولخبط حسابي
وانا ما اشره على وقتٍ خدع ناسٍ بدون قلوب
على نبض القوافي لومي وشكواي وعتابي
منول كنت اقول عن المحبة مستحيل اتوب
اثر كثر الغلا والشوق للعشاق غلابي
من أوهام الصبا رديت لا غالب ولا مغلوب
والاحلام القديمة دونها صكيت الابوابي
هويت ولا دريت ان الهوى كله أسى وذنوب
على رغبة مقادير الزمن نوخت بركابي
تحملت الكثير وشابت احلامي وانا يا دوب
دخلت لعالم العشاق من نظرات الاعجابي
يقولون العرب راع الهوى من راحته مسلوب
يعيش العمر كله في شقا لعيون الاحبابي
وانا مدري وش اللي جابني للعالم المنكوب
انا مالي ومال اهل الهوى عوجان الارقابي
رمت بي دنيتي مع عالم يمشون بالمقلوب
تشيب احلامهم وايامهم والوقت ما شابي
يسوقون العمر سوق المطية لو بدون دروب
ويشرون المحبة والهوى مفتاح الاسبابي
وانا ماني على طرد الغواني والهوى مغصوب
وقلبي من صواديف الليالي والهوى ذابي
اقوله والغلا شي من الله والهوى مكتوب
وانا من ناعسات الطرف الاكحل طحت منصابي
ذبحني بالمودة والتغلي جاهلٍ رعبوب
مغير اقصد واهيجن باسمها في كل مرقابي
هنوفٍ كل ما اذكرها خفوقي في حشاي يذوب
لها كل المودة والغلا من دون الاقرابي
عطاها الله جمال الكون مافيها ولا عذروب
ولا شافت عيوني مثلها من تزهي الاسلابي
حلاها منتثر من مفرق الهامة ليا العرقوب
خذت زين الوصايف وهبةٍ من رب الاربابي
أمانه سلمي لي يانسانيس الهوى مطلوب
على نجل العيون الناعسات وسود الاهدابي
وخصرٍ هايفٍ من ضيق وسطه ما يظيم الثوب
وردفٍ تشتكي من ثقله اقدام الغضي نابي
وردي خالص اشواق الخفوق الهايم المعطوب
على تالي بقايا عشق وقتٍ صاحبه تابي
ليا مرّيتي اطلال الحبايب دوّني مكتوب
على صفحة غرامٍ فاول الصفحات بكتابي
على عصرٍ مضى كن الغضى في داخلي مشبوب
ليا حنيت لايام الغرام وضقت بغيابي
توارد قلبي سهوم الهوى من كل حدب وصوب
وانا ادري بالهوى مكتوب مالي عنه مجنابي
ليا طابت جروح القلب كدر همي المشروب
وضاقت بي متاهات الدروب وضقت بثيابي
وعشاق الهوى دايم مزاياهم تصير عيوب
يشيلون الدوا والدا ولا يلقون الأطبابي
تدور بهم مقادير الليالي والعمر محسوب
يعيشون الحياة اغراب ويخلونها أغرابي
ورغم اللي يجيهم من مآسي شربوا الملعوب
يشوفون الوجع بالحب ويعوجون الارقابي
- عوض القوانة
