سبحان من ذي قدرته واقتداره

المعطي الله والحسد طابع الناس

ناسٍ على الطيب تسوق القشاره

لين اصبح الطيب من الوقت ينداس

ما عاد يفهم في نظام تجاره

لانه نظامي صار ناتجه اللافلاس

الجهد له والرزق يا خذه جاره

جارٍ قعد ما هوب للرزق عساس

يعني تحمل للتعب والخساره

وضاع النصيب وضيعه قوة الباس

النار ما تبدى بليا شراره

ومن لا حذرها تاقع الفاس بالراس

هذا مثل واصبح مجرد عباره

ما عاد بالامثال عبره ومقياس

هذا المخالف ملتفت للاشاره

لا خربت الدنيا ولا طاحت الفاس

وقتٍ على العاقل غريبٍ قراره

كاذبه معتاشٍ وصادقه محناس

احداً على كيفه يحدد مساره

كل البسيطه له مكانٍ ومجلاس

و احداً تعذره السهل والزباره

تلعب به اقدار الزمن للعب قرطاس

واللي عرف قدر الزمان وقاره

ارتاح من وقته بعد طاله الياس

من قبلها صلى صلاة استخاره

الرازق الله والبشر عدة اجناس

جنسٍ عطاه الله نفوذ وشطاره

وجنسٍ ولد ويموت وشفاه يباس

لكن طلعت من الحياة بعباره

المعطي الله والحسد طابع الناس