كتب - زبن بن عمير:
رجلان نادران وشاعران علمان يشاركان في كثير من صفات المجد والجود والكرم والنسب والعرفة والتواضع.
هذه القصيدة وجهها الأمير عبد الله بن محمد بن سعود الكبير- يرحمه الله- للأمير سعود بن محمد بن عبدالعزيز حفظه الله.
يا سعود ما جالك على الصلب مطلاع
سوجة نفس وتوسّع الصدر يمّه
تشوف عشبٍ غاديٍ له تنواع
يبعد عن الخاطر عماسه وهمّه
تخيلف النوّار ظافي على القاع
من كثر ما دهم السحايب تعمّه
الصبح شوف الطل يكسيه لمّاع
والعصر يرسل لك عبيره تشمه
الطير بربوعه تغاريده أنواع
صوته لراعي الصنف مثلك يهمه
كم صارلك فيها مداجٍ ومرباع
شِربْتْ من ضحضاح ماها وجمه
يمناك في بذل العطايا لها باع
ومنزلك بين الناس في راس قمه
هذه القصيدة رد الأميرسعود بن محمد بن عبدالعزيز- حفظه الله وعافاه- على قصيدة للأمير عبدالله بن محمد بن سعود الكبير -يرحمه الله-.
يا بو فهد يا وافي الشبر والباع
ياللي جميع أحوال ربعه تهمه
أنا ربيعي في حْمَى زين الأطباع
إلى ذكره القلب ينجال غمه
وإلا ربيع الصلب شهرٍ وينلاع
لو زاف لابد السمايم تدمه
شوفة هوى بالي ربيعٍ ومرتاع
في روضةٍ تبعد عن النفس همه
وإن جا على شقر العبيات مفزاع
عاداتنا ننثر على الخصم دمه
غرٍ بهاليلٍ على الموت بتاع
مثل البحر لى هاج من جاه طمه
واليوم حنا في حسينات الأوضاع
في نعمةٍ كبرى عسى الله يتمه
