وين انت غايب ما لقيتك بها العيد

يا للي بقربك جملة ايامي اعياد

العيد يوم يطل ما فيه تجديد

الا غلاك اللي مع الوقت يزداد

والله لو تدري وش عروقي تريد

ما تترك يدينك عن يديني بعاد

ما قلت بشفاهك عسى عيدك سعيد

واحس باقي فرحة العيد تنعاد

الله كم كان اهتمامك به يزيد

وتسّوي من العيد للعمر ميلاد

يا ما صنعنا من يدينا تقاليد

ويا ما تبادلنا الهدايا والاسعاد

واليوم خليّت التهاني تناهيد

شحّيت بالحلوى على مر الاكباد

دقات قلبي رتبّت لك مواعيد

ولبست لك من شوقي ثيابٍ جداد

دورّت لك بين الغنا والزغاريد

ولمحت طيفك بين الأعين والاجساد

قطفت له من تحت صدري عناقيد

عيديةٍ تغني عن الشرب والزاد

غنيّت بغيابك من الوجد اناشيد

حتى الاماني ملّت من التوجّاد

لإسمك بصدري صرخةٍ تقطع البيد

كتمتها من خوف شامت وحسّاد

يا اجمل عطر له في زواياي تغريد

يا اعذب غلا شاعر عن رضاك نشّاد

قبل الأمل تظهر عليه التجاعيد

ميّل وانا بافرش لك الروح سجّاد

تبي الصراحة ما تهنيّت في العيد

عيدٍ بدونك يا هوى البال لا عاد