آخر ما كتبه الشاعر المعروف سعد الخريجي نص يخص به «مدارات شعبية»:

يا باني البيت تكفى شد الأطنابي

الريح خايف تهد البيت واطنابه

في البيت هذا قمر تلعات الأرقابي

الزين عنده خذاه ونوّخ ركابه

في برّه الشيح والقيصوم هلاّ بي

وحبّ النقا شيمة المحبوب لاحبابه

ما أحس نور القمر لو مرةٍ غابي

حتى بتالي الشهر نوره على هضابه

هذي حياة البداوه وسلم الاعرابي

ما بين نخوه وعزوه وطيب تزها به

مالوم راعي الهوى لو ناظره شابي

تشوف رسم الهوى في داخل اهدابه

ياما حلاة المطر في تلّة النابي

والاَّ بوقت الضحى والنار شبّابه

تشرب من الكيف دلّه تريح الاعصابي

والقرص وسط الجمر مدفون بترابه

وتسلم صقور الفلا في كل مرقابي

تاكل من الصيد والمقسوم تهنا به

لا جيت عند الرجم قام يتلوّا بي

يتذكّر اثنين عنده كانوا أصحابه