جزنا وطول الهرج ما فيه اثمره

يابوي وش لك بالهروج الزايده

هذي سواة اللي تعيِّد به مره

يمضي عليه العيد ما أحدٍ عايده

***

نفسي تشاحن عليك من أمس والبارح

أنا أتقرَّب لشوفك وأنت تبعدني

واجد جروحك ولكن جرحك الجارح

إنِّك تناسى المعايد ما تعايدني

***

أعايدك وإلاَّ تعيِّد بدوني

أنا بدونك ما عرفت أتعيَّد

غيّرت هندامي وشكلي ولوني

لرضاك وإنت لكل غلطة تصيَّد

***

من يوم صار العيد زحمة رسايل

صار الفرح بالعيد تحصيل حاصل

اللي نسى معذور والشك زايل

واللي يواصل حقّه إنَّا نواصل

***

يا سيّد أبيات شعري في قصيد الغزل

عيدك مبارك عسى عيدك يعيد وسعيد

أتنفّسك وأعشقك وأهواك ولا أزل

فالعيد لا شح شوفك قلت ماهوب عيد

***

يا ليت لي قلبٍ من العيد للعيد

ما ينتظر على أمل يلتقي به

العاشق يسوِّي لقلبه مواعيد

هذي سواة اللِّي يضيّع حبيبه

***

عيدي مواجهك لا شفتك وعايدتك

وما استطعم العيد كانه مر من دونك

عهد خذيته على نفسي وعاهدتك

ما أعايد الناس قبل أعايد عيونك

***

وشلون نعطش له وإذا جاء نصومه

وكيف نتعايد لا رحل بالقصايد

ما دامنا من (حول) نرجي قدومه

مفروض لا منِّه رحل ما انتعايد

***

بيني وبين العيد تشرق معي شمس

مع نورها كل يوم فجرٍ جديدي

قام القصيد وفز لعيونها الهمس

هي ملهمة روحي وبسمة قصيدي

***

صباح العيد لامر الأماكن

تسيل الشمس من فوق الثرى ضو

صباح ثنين زعلانين لكن

صحو بدري من الشوق وتراضو