يارب تهديني وترزقني دروب المهتدين

أطلبك درب الاستقامة والزيادة في الأجر

أنت المجيب أنت الحكيم أنت الموفق والمعين

أنت القدير تفجَر الانهار من صمَ الحجر

خوف ورجا في الارض تسجد لك جباه الخاشعين

يا حظ صدر اللي بتوفيقك وتسبيحك تجر

يا حي يا قيوم يا علام ما تخف السنين

الحظ فضلٍ منك ماهو بالمحايل والزجر

مايستهمّ من الزمان إلا صدور العاقلين

اللي يعرفون السنين أتشابه اوراق الشجر

ياصاحب القلب النصوح النصح طبع المصلحين

كلٍ له اعماله رصيد اللي صدق واللي فجر

صل الفروض الخمس وأركع لك لو إنه ركعتين

في غفلة السالي قبل لايذّن آذان الفجر

رتل من الآيات وأقرا في رياض الصالحين

هذي تراها أخير من دنيا التفاخر والهجر

وإن كان ما أنته لا كريم ولا حكيم ولا عوين

يعني بدون مجاملة لا أنته زناد ولا نجر

من واقعي صغت الدرر ماجات من شوق وحنين

لو إن شوقي مثل كسر العظم يسجرني سجر

واسلم ويسلم من عطال العلم يالقلب الفطين

المعرفة والطيب مافيها صكوك ولا حجر

ياللي تشوفون الحقايق شوف وأنتم ساكتين

يامعمرين المدن والابراج من بعد الهجر

أكبر دليل من العقل والمعرفة متشبعين

أصدوركم لو ماتحسب حساب يمكن تنفجر

هذي حقيقة والحظيظ اللي كسب دنيا ودين

يالله توفقنا وترزقنا الهداية والأجر