الموت هيِّن.. البلا وش ورى الموت
عند الحساب يهون سهم المنايا
باكر نموت وتصبح قبورنا بيوت
عقب القصور بضيّْقات الزوايا
في جوف الأرض وكل من حولك سكوت
وتعاقبن بالقبر عوج الحنايا
يا رب يا منجي نبيك من الحوت
سترك وعفوك يوم كشف الخفايا
باكر ليا جينا على داعي الصوت
شيبان وأطفال وشباب وصبايا
يا رب تهديني قبل لحظة الفوت
وتغفر ذنوبي يا كريم العطايا
أشكيك همٍ داخل الصدر مكبوت
وأيامي اللي بالخطايا ملايا
إن لاذ بك من كان طايع ومبخوت
في من يلوذ المرتكب للخطايا
يا رب يا قادر على كل طاغوت
لا ياقف اللي وحدوا بك خزايا
رحماك لامنَّا صحينا من الموت
واليا وقفنا عند بابك عرايا
الشاعر/ متعب التركي
