ما لي عليك من العتب والمشاريه

ياكود شيٍ بين نفسي وبيني

احس به يلمس خفوقي واداريه

واخاف لا غيري يشوفه بعيني

يسكن زوايا الروح وادراه وابكيه

وابعد عنه والقى العنا يحتريني

جرحٍ قديمٍ ما لقى من يداويه

ما يندمل لو ينغرس في سنيني

جرح الرفيق اللي بعادٍ حراويه

مستامنٍ من بندقه لا تجيني

القلب فيه من النياشين مافيه

رميات خلاني ونبرة ونيني

يا راعي البندق رميته وتخطيه

هي خانتك والا الفشق مايبيني

هاك الصدر خذ من سعة لا تخليه

وان ماكفى قل للمحاني عطيني

وابشر بدمٍ ماتت اعداي ترجيه

وحجاج شيخ وكل ما في يديني

رمي الظهر غدر ونذالة لراعيه

والا الرجل يدحم بجنبٍ متيني

العِلم لاجاك اوله جاك تاليه

ما اعيد كلمة خاطري مرتينِ

مشواري بدونك بدا لازم امشيه

والله على نسيان رميك عويني

ما لي على مثلك ملام ومشاريه

شفها بخشمي والسعد في جبيني