كل ما قمت أتذكّر قصة الحب القديمه

هلّت الدمعه عيوني لين تذرف كل ماها

يا وجودي وجد رجلٍ كان له حشمه وقيمه

شيخ قوم وكلمته لا قالها ما حدٍ عصاها

ودارت الدنيا عليه ويوم سوى له جريمه

انتحى ما عاد يدري عن جميع ارضٍ وطاها

تايهٍ رايه وحاله من سبب فعله سقيمه

علّته بالقلب والعلّه عجز يلقى دواها

وصار خايف من عقب ما صار له قدر وحشيمه

ومات من كثر القهر والصدمه اللي ما قواها

وفرحتي من عقب نور العين تشبه لليتيمه

مات ابوها وامها والطفله انهارت قواها

لو بكت ما عاد ينفع للجروح اللي اليمه

وكل مرتاحٍ يقول البنت هذي وش بلاها؟

ما درى عن عبرةٍ في صدرها دايم مقيمه

واقرب قلوبٍ لها شافت مسيكينه جفاها

مثل وجدي لا سرحت بقصة الحب القديمه

وهلّت الدمعه عيوني لين تذرف كل ماها