الليل هذا غير والبارحه غير
مع فارق التشبيه تلقى المساحات
والأمس غير اليوم واليوم تغيير
الأمس فات وباقي اليوم ما فات
ياما تعبنا من صدوف المقادير
وياما شكينا من متاهات واهات
مالله عطاني مثل ماعطى شكسبير
لكنه اعطاني قناعة من الذات
راضي بما عندي ولو عمري اصغير
سطح القمر راسي وفكري محطات
الماضي اللي مقتبس قصة الزير
يعني نجاح وموهبه بالمهمات
والواقع يحطم طموح الأساطير
والقادم يبرمج علينا المتاهات
وحنا نعيش الأمس باليوم تفكير
تعقيّب للي يقول مافات لك مات
ابشرح اللي عندي بدون تأخير
واصحح الجمله بوسط الملفات
الماضي اللي يعتبر فيه تذكير
جثّه جسدها ينرسم لك بلوحات
تطغى على كل الخطط والمعايير
ويفتح عليك اصدق جروحه بهمسات
اليا متى نبقى على خير ياطير
واليا متى طعم السعاده معانات
اليا سكبت الدمع ماعوضك خير
وليا حبست الدمع لا يمكن تبات
واليا متى نشكي بصيغة تعابير
واليا متى نزف المعاناة فابيات
ياكثر ما سأل نفسي بدون ماشير
وياكثر ماردت على الصوت بسكات
ليت السعاده تنشرى بالدنانير
وليت السهر ياخذ من النوم لحظات
وليت الصباح يبين ويغرد الطير
ويريح اللي ساهر الليل مابات
عبدالله بخيت السناني
