ايا شِباب الوطن ياهل السعودية

تكفون صدو الذي يَقْرَب من حماها

كَثْروا علينا العدا وبانت النية

ودون الوطن به رجالٍ تِرْخص دماها

يااهل الشمال ويالمنطقةِ الجنوبية

وياشرقها وغربها ويا أهْل وسطاها

وقت الوفا حان يا احرارٍ نداوية

وبْلادنا ارواحنا ياجعلها فداها

وقت الوفا حان يارجالٍ فداوية

أما حياةٍ عزيزة او بليّاها

حنا سندها ليامن كَبْرَت الهيَّة

وروسٍ تبينا بشرٍ بنْتوطاها

فيها ربينا مابين فيّة وفيّة

وندعو عسى الله بالخيرات يجزاها

لااله الا الله شعارها وسنية

وعلى طريق الشريعة سارت خطاها

الدولة اللي استظلت السلفية

في ظلها سنين وكَثْرَوا لاجلها عداها

أنا سعودي وكلي فَخْر وحميّة

وارخص حياتي لجل ماها وصحراها

وهذي بيوتٍ تبيّن كل مخفية

جوابها يوضِّح الهجمة ودعواها

جوابها يبصّر اللي تاه في غيّه

ويثبّت اهل الوفا اللي طاب مجناها

بعض الدعاوى تجي باحلام وردية

ومن خبثها الليل الاسود في خفاياها

لايغرّكم جلدٍ املس في ظهر حية

كل السموم المميته في ثناياها

ترى العدو بيّنة لنا مواريّه

وكل الدعاوى المريبة بان مغزاها

من عقب قِطع الوحي احدعش هجرية

مافيه عصمة وعادت صوب مولاها

لكنّ به فرق يميِّز ذي عن ذيّه

هذي الشريعة تحَكمْها وهذي سْواها

يااهل العقول الفطينة فكرو شويّة

منهو الذي مثلنا بالشرع ييتباها؟

وليه تِتْرَك دول ماهيب شرعية

وتْحارَب اللي على الوحيين ممشاها؟!