هذا قصيدي والورق تحت الأقلام

الشعر غالي وخافي الهم غالي!

أخفيه وسط الصدر عن كل لوَّام

عشان ما أحدٍ يزعجه بالسؤالي

الله وكيلك ويش سوّت هالأيام

اللي تركته لحّقته الليالي

شوف المكان اللي جمعنا من العام

يسأل خفوقي عنك يا ويل حالي

كنَّا نجي له مع بعض مثل الأيتام

واليوم أنا جيته يتيمٍ لحالي

أنساك واتردّك على الشعر الأحلام

أكتبك حزن ويبتهج من قرالي

أشربك بغيابك لو عروقي صيام

وشلون لا.. ما دامك أغلا حلالي

تعال واقتل جرح بعدك والأوهام

يا واقعي ياللي تشابه خيالي

الوقت يرجع بي ورى وانت قدّام

ظامي وانا لعيون وصلك زلالي

راعي الغلا لا عاش ليله ولا نام

لا واهني اللي عن الود سالي

وانا عشان الوصل عنّيت الأقدام

البعد ضيّقني وصدري شمالي

اقوم واقف لكن الحظ ما قام

والوقت هو اللِّي يضد الرجالي