كنت أسمع أخباره قبل ما ألتقي فيه

وارفاه في نفسي وأبهّر دلاله

واشفق لوصله وأتلذذ بطاريه

واضماه وأسعى في رضى من سعاله

وفجأة روت عيني رضاه وتغلّيه

وانساق بعروقي هواه وزلاله

ساقتني الصدفة وساقت خطاويه

والكل منّا صادق الود فاله

خطم وعيني مالها شف تدعيه

ورفع غطاه وطاح رجمي لحاله

واقفى يراعيلي وروحي تراعيه

وارخى على زاهي جبينه بشاله

ولو ما هرج بان الحكي في مواريه

وداعب وفاه مودّعه وانثنى له

يلج صمته في معاليق مغليه

حتى لو انه ما حكى ينحكى له

أقرا عيونه واعرف اللي مخبيه

ويذوب في صدري غلاه ودلاله

كانت ضلوعي مجدبه في حراويه

واليوم ربّع فيضها من وصاله

اقبل غلاه وودعتني مآسيه

وانساق عطره والشموخ انحنى له

وغنيت له عشق وطرب قبل لا اجيه

وعلّقت صدق اجابتي في سؤاله

هو حلم يشربني ولع وافتخر فيه

مدري جنون اجتاحني طول باله

بس الاكيد اني قبل ما التقي فيه

كنت اشربه واضماه واعشق وصاله