يقول عبد الله بن عون:
شعتني علوم الصيف وارقلت للمسناد
ولاعاد يعذل واحد طافح شبله
آبي عبلة ضافي عليها كما السجاد
ديار يرود عدودها من يحب ابله
ولاعاد لي من يوم سال الشفا مقعاد
عتيبي وداري فوق ونحيتي قبله
مادامه وكد لي سيل وادي قليب عناد
انا ويش يحرمني شفا نجد والعبله
ابتبع هوى وضحا تحط اللبيد سناد
لها غير زين طبوعها خدة قبله
ليا سمعت الحادي نده ندهة الميراد
تقود اول الزعجول لول وتقرب له
ابيها ترفع فوق عن ساخن الانفاد
وتجي في فياح كل مصلاح يطرب له
انا في الديار الطامنه في تعب وجهاد
على كثر مرعاها مداخيلها خبله
عساها يساقيها المطر ديرة الاجواد
ولابيها لون ثمامها ينقلب ربله
فقال سعد بن جدلان الاكلبي:
شعتني قصيدة شاعر عذب القصاد
ماحد يستلذ السالفه لين تنسب له
علومك يا بو نايف قراح ٍ على الأكباد
لكن تجرح قلوب ٍ مع الوضح منهبله
مواليف وضح ٍ كنها وضحى بن عبّاد
الا شافها راعي الدبش طيرت شبله
تواغض مع الريضان كنها خيام أسياد
لونها بعيد ٍ بادي الرجم تقرب له
أو حمّى مغاتير ٍ مقاديمها شراد
هريب السحاب اللي تواليه منسبله
قبلها ليا من المناره سناها زاد
قبل الاشهب المرشوش لا فضوا اصطبله
عنقا مارق نسنوسها سدوها منقاد
مع طول خدتها خراطيمها سبله
شناح طفوح شبلها دايم خدّاد
لونها مع ذود ابن عمي خذيت ابله
لا ضاقت براعيها الوسيعه بكل بلاد
يحوّم وكبده من هل المدن مندبله
لا منه نطحها عصر ولا هجد مهجاد
ليا شافته قامت ترازم ترحب له
هذي تنطحه تبغى تقبّله جد عماد
وهذي تنهب شماغه وهذيك تلعب له
والله ما يهني من حكم عاصمة بغداد
اللي له مزامير الفخر تضرب الطبله
ثم قال محمد بن عبّاد السلولي:
جذبني صدى صوت ٍ تلاحت به الأطواد
يتعّب هواة الشعر بعده ومن قبله
صدى صوت عرّافٍ لشعر الأدب روّاد
منابع عيون الشعر والكلمه الذبله
تلاحوا على وضح ٍعليها العيون حداد
ولوف ٍعلى صوت الموده تراقب له
دقاق العنوق اللي خراطيمها ورّاد
على حب راعيها شغوف ٍومنجبله
تقدم لها بن عون في وصفها نشّاد
و شعا الأكلبي والأكلبي تلني حبله
و انا قبل صوته ماشي ٍفي الطريق حياد
على ما تقول الناس كل ٍ على هبله
و بعد زعزع الوضحى فلا عاد لي صدّاد
سلولي و قلبي طاري الوضح يرغب له
ابتعب واحاول لو لحقني عنا وانكاد
على منهجٍ ما كل قاف ٍيناسب له
و انا في هواها مغرم ٍهايم ٍمنقاد
لو اكثر علي اللوم في حبها الابله
اوقع لها بالعشر واشهّد الأشهاد
انه لاعب ٍبي حبها لعبة السبله
