الا يالله بنو الخير لاتجزى حمام ناح
يزيد الهم باصواته وروحاته وجياته
يذكرني زمان قد مضى كله طرب وافراح
زمان العام والا اليوم لاوده ولاهاته
الا واعزتي للي جزت عينه وسده باح
ولايبغى العرب يدرون باسراره وغاياته
ولاتقضي هواجيسه ولا يقعد ولايرتاح
تغزر واشتغل فكره وهي ماهيب عاداته
على اللي تل قلبي من عروقه في يديه وراح
طلع درب مثل (طلعة كرى) صعبه ملفاته
توافقنا على بير طويل مثل بير رماح
وانا فيه اتفرج لين غلق كل حاجاته
وانا عودت يم البير مثل اللي يويق وطاح
تكسر به ثمان ضلوع واذراعه وترقاته
وربعه مالقوا حبل طويل ولابهم سباح
وهو في قاعة البير الطويل يجر وناته
يابو عين كما عين الوحش تذبح بغير سلاح
وخد وجيد فيها منوة العاشق ومشهاته
اهوجس فالنهار وفي ظلام الليل اصيح صياح
ولا ينلام من ذاق الغرام وذاق لذاته
فلاشك البلا من دونها كسابة الامداح
قضبها في يدينه واحد قضب العمى شاته
وغلق دونها باب الحديد وكسر المفتاح
وانا مقهور من جور الزمان وحر لوعاته
جرحني صاحبي جرح عجز بعلاجه الجراح
حسانيه القديمه ماتكافح ربع سياته
هكالحين الاوادم ماتشكك والقلوب صحاح
وتال الوقت كل شانت ظنونه ونياته
- أحمد الناصر الشايع
