أضيع بزحمة الدنيا وأعاني زايد الأحزان

وأعيش العالم الصاخب وفيه الفكر محتاري

وذهلت بشوفة أوضاع غريبة ما لها برهان

أشوف اللي ردي يكرم ويجلس وضع مختاري

ولئيمٍ فعله الخايب ولا له بالوفا عنوان

يا كثر اللي يحمدونه وهم من ضمن الأشراري

ورجل يجمّع الثروة ويزعل لو وجد نقصان

ولا يعطي ولا يبذل يقول الوقت غداري

وأنا همي أشوف الطيب ومرافق اللي صيته بان

ومن يشقى على طيبه ويصاحب دوم الأخياري

سلام الله على رجلٍ زمى في عالي البنيان

يحوف المرجله ويتعب على نعمٍ وله طاري

وعلى رجلٍ فتح بيته ويكره صكة البيبان

يلين بجانبه للي شكى من كثر الأمراري

وعلى رجلٍ رحومٍ ياصل القربا مع الجيران

يبر بوالديه اللي من أجله شافو أكداري

ورجلٍ مدته جزله وضاري يكرم الضيفان

كريمٍ والكرم يستر عيوب الشخص ويداري

واختّمها بشكر الله عظيمٍ خالق الأكوان

وصلاة الله على طه شفيع برحمة الباري

- الشاعر/ صنت طلق العير المطيري