تراها الصورة اللي جا عليها فالوداع علوم

فديتك ما سواها حرّك الخفّاق واوجاعه

عسى يا احلى هدايا الكون منت بمن حلال القوم

عسى يمّي يجيبك من تركتك عنده اوداعه

معاك اضيع يا عمري وابي لو ساعةٍ من يوم

تضيّعها معي وانسى وش اليوم وكم الساعة

عشيرك من يد الترك ليد الفرس ليدين الروم

هذا هو يعربيٍ لا نسى حلمك ولا باعه

تعال الكل ينشد عنك وطيور الخيال تحوم

وانا مابين طيف وصورة ودفتر وسمّاعة

من اول ما اصبح استفرد بنكهة سرّك المكتوم

واهيم بكل شارع واندهك واخرج عن الطّاعة

أطارد شمسك اللي لآخر الدنيا بدون غيوم

والى منّي ذكرت اعيونك ومغناي وشراعه

أجي يم البحر واحكي له اوّل ما عرفت العوم

وفوق الشّاطي ارسم وجهك اللي سافر اشعاعه

والى جا الموج يمّي ضمّت ايدي وجهك المرسوم

وطاحت نجمتينٍ مرّت الخدّين مرتاعة

واعوّد للحدايق ما بقى من زادي الا اللوم

أدوّر عن عبيرٍ كم وكم نسمة من اتباعه

أداعب وردها والفل والريحان واليشموم

ولا هو ملمس الورد الطبيعي يا اجمل انواعه

وانشّد عنْك اناشيد وعصافير وشجر وكروم

وكرسي باهتٍ لونه وسبع اخيوط لمّاعة

واشوفك في فساتين وذهب ومعلّق بمنظوم

واخبّر بك سرايا كل سوق وغالي بضاعة

واشيل اوراقك ام حروف وقلوبٍ تشيل سهوم

واغنّي ما طرى واطبع عليه الطاري اطباعه

واعوّد للوسادة في مساً ماله قمر ونجوم

اصحّي صورتك من نومها وتفز فزّاعة

أنام بحضنها لين الصباح يقول صحّ النوم

وافيق بوجه نجمٍ من صباح الخير مطلاعه

ناصر القحطاني