يا الله يا مقسم على الناس الارزاق
يا عالمٍ ما بالعلن والخفايا
تبري صواب القلب والقلب ما طاق
من همه اللي فيه زاد الكوايا
صبرت يالمعبود والبال ما راق
والحزن سوابي بوقتي سوايا
مالي جدا غير اطلبك وانت خلاق
يالواحد المعبود رب البرايا
همي وتعلم به ولك جيت تواق
اطلب رضاك ورحمتك من شقايا
جيتك وانا دمعي على الخد دفاق
والحال ناحل من كثير الشكايا
يشكي عليك ويطلبك حسن الاوفاق
وتبعد همومه يا مجيب الدعايا
انت الامل وانت الرجا فيك ما ضاق
عفوك ولطفك يا عليم النوايا
ادعيك من قلبٍ من الهم مافاق
ولا نصيت الا انت شاكي عنايا
نواف بن محمد الصخابرة
