برق دعاني من ورى البعد لماع

تقبل عليه العين عجل ندبها

له من زمان العام غيبات ماشاع

ليالنا عقبه تروع عربها

يامرحبا شرّف على حدب الاضلاع

وابسط يمينك ويتساوى حدبها

يجي لروحي بين اصابعك مطلاع

وتبدي مواجعها على مغتصبها

تشكي عليك ومنك يا حلو الاطباع

وتذوب من عينك وضافي هدبها

عين محاجرها ورى البرقع وساع

ما تروي الناظر لو انه شربها

والعاشق اللي عاكست معه الأوضاع

ما عنده الا مهجة قد وهبها

واليوم يا مصياف الاحباب مرباع

ورجع مجاهيم السحاب احتلبها

يمطر على قلب محس وملتاع

النار كنها فيه تقرض حطبها

بدر مطاليعه مناصيف وارباع

يجلى هموم النفس مما كربها

جاني بعد ماغاب عاصي ومطواع

يبغى العزوم وشتت الله شعبها

بحر الغرام ومركب الشوق شرّاع

جلاّب نفس عند خله جلبها

شايع العيافي