الله يِذَكِّرك الشهادة كان تذكر ما نسيت

اسمي ودَقَّة هاتفي.. وصوت الحزين.. ونبرته

ما فاتك إلاَّ ساع ما قفّيت عن عيني بكيت

فاتك تشوف اللي صباح العيد ذَكَّى عبرته

تبغاني أردد عليك اللي كتبته بيت بيت

عن بكرة آبيه الشعر ولا أبيه وبَكْرته

قمت أتوجّد بعدما روحت لكنّي هَديت

ذكرت من قال الحيا لا اقفى تِحَرّم سبرته

أكيد تذكر ليلة الفرقا تراني ما خطيت

لكن لقيت إن التفاهم صعب وأصعب دِبْرِته

كنت أسألك ليه الغموض يحيط بك واذا ثنيت

يَاقُو عذرك واللي أقوى منه فعلا حَكْرته

دامك قدرت تغيب ليه تجي وانا تَوِّي بديت

أَجبرك يا كسرٍ بقلبي ما تِّجبِّر كَسْرته

يا مشتكيني للجفا وانا على وصلك شكيت

يا ما ربطني في رشا الآمال وامحل مكرته

ليلة ضياعك أو وداعك المهم إني غديت

كنِّي بدويٍّ في خلا قَيَّل وهَجَّت بَكرته

أنا يا ماضي ما مضى من ما حصل منك اكتفيت

بالله يكفي مَيِّتٍ بِلْشَتْ يديك بْقَبرِتِه