سلام الله على خلّ ٍ حضوره يبري العلاّت

ليا هلّت مرازيم الوصال بْما يسرّ العين

حضورك يا وزين الروح يدْمح سيّة الغيبات

هلا بك عدّ من طاف، وسعى، واقبل، وقال آمين

أشبّه فرحتي بمْعانق الكفّين والنظرات

مثل مايفرح العاطل لـَ جاه بديرته تعيين

وانا مثل البشر يا زين لي شفّ ٍولي مشهاة

على وضح النّقا لا من حضرت احقّق الثّنتين

ألا يا زين ياللي غايض ٍ في زينك الخفرات

عليك الله وامانه لا تِزيّن فوق مَ انته زين

ترا قلوب العذارا تصطفق واتجاذب الونّات

وتصيبك تهمة اللي ماتخاف الربّ طرْفة عين

إذا شفتك ذكرت الله واسمّي واذكر الآيات

وياليت الناس لاشافوك يقرون المعوّذتين

جذبني لك حلاك وندرة طْبوعك وطيب الذات

ورقيّ اسلوبك وعفّة يديك عن الرّدا والشين

انا احبّك واحبّ اللي تحبّه يَ ابيض النيّات

واغار من الهوا لا هبّت النّسمه على الخدّين

انا لك شاعر ٍ ما يذخر النّادر من الابيات

على شانك كتبت الشعر لو ما يعجب الغاوين

سلام الله على روحك سلام ٍ يبري العلاّت

سلام ٍ صادق ٍ ما يعتريه الشكّ والتّخمين

سلام اندا من كفوف الكريم وراعي المدّات

سلام الذّ من وصل المحبّه عقب طول البين

الشاعر: جمال العديم