حدر القمر صوّت لخله وناداه

ثلاث مرات وبالرابعة ون

حدر القمر يا ما همس له وناجاه

وعيونهم ياما بنوره تلاقن

والبارحه عدا على الذيب بعواه

واقفت ظنونه بالليال يتعادن

مرٍ حوالينه ومرٍ تعداه

ومر تضاحك له ومر يتباكن

هذي سواة اللي عن النوم قزاه

طيف الحبيب اللي على خاطره عن

الأمير خالد الفيصل

***

عشقت القمر حيث القمر ينبعث به نور

واخص الليالي البيض تزها ويزهنه

واحب الهوى لاهب من خايع ممطور

وريح النفل حيث النفل طيب الخنه

واحب الجماله والجماله عمل مبرور

واحب الغناه وعز نفسي عن المنه

واحب الصراحه والصراحه بها مسرور

حيث الصراحه تقطع الشك والظنه

واحب الكريم اللي يفرج عن المعسور

اليا من عطى حتى اهله ما دروا عنه

سليمان الهويدي

***

قمر شهر عشره وبراق قبلي

لا شفتهن مالي مع الناس مقعاد

يا كثر ما قالوا لي الناس مبلي

وراعي الولع ماهو عن الناس نشاد

لا جيت قيعان عقب رش وبلي

ولقيت جرة من له القلب منقاد

باطراف روضٍ ما توطاه قبلي

حيٍ من اللي تارسنٍ راسه عناد

- حمد السعيد