ينزع الحر للعالي المنيف
عادة الحر لطام يعاف
ذلني الشوق يالقاسي اللطيف
ولحظة الوصل من صدك تخاف
أنا قلبي جناحٍ له رفيف
يتبع الشمس في الريح الصلاف
للوعد جيت من لون الخريف
وللوعد جيت من طعم الجفاف
الأمير بدر بن عبد المحسن
***
قل لي (على الله) وابتعد عنك وارتاح
قلي (على الله) بس من غير تجريح
من شب نار الشوق يا شوق ما صاح
واللي وطاها يشرح الجيب ويصيح
لولا الغلا ما هانت النفس يا صاح
محبتي لك ما وراها مصاليح
وشلون تنسى يالغضي كل ما راح
مركب غرامك سار مع وجهة الريح
عبد الله العليوي
***
ياصاحبي واللي خلق نعمة السمع
انك هنا بين المعاليق ثابت
ماجيت لك صدفة ولاجيت لي رمع
وان غبت عني فرحتي معك غابت
والدمع هذا اللي تشوفه ماهو دمع
أشعلت عيني لاجل اشوفك وذابت
واللي نزل منها على خدي الشمع
ارقد مادام الشوق في القلب نابت
تركي الميزاني
