عدت سنه ماركب في هامة الراس
بيتٍ ليا قلته يعدل مزاجي
وانا كذا لاصابني ضيق وعماس
القى بترديد الجزايل علاجي
اطفي بها عن خافقي كل مقباس
مقباس همٍ يعترضني مفاجي
يلومني ليه البطا نايد الناس
ايحسّب ان الشعر بالسهل ياجي
ما يدري ان عندي للابداع مقياس
مانيب اوردها على الما الهماجي
الشعر يحيي بي معاليق يبّاس
مثل المطر يحيي هشيم الفجاجي
لاصرت ما ارسم به معاناة الاحساس
اقاطعه واعلن عليه احتجاجي
احيان مالي خلق واحيان منحاس
واحيان جوي فيه مثل العجاجي
واحيان في لازم هل الطيب عساس
لجواد مالي عن طلبهم محاجي
ياصاحبي والوضع شايك وحساس
وانته من همومي تدوّر خراجي
فان شفتني في حلو هندام ولباس
ومريحٍ بالي ومطلق حجاجي
لا تحسب اني طرب وان بي توناس
ترا الصدور احيان مثل الملاجي
يدفن بها هم الزمن طيب الساس
عن الخبول اللي تحب العواجي
