خلوني أدله تالي العمر وأروح

وأصد وأبعد عن ضجيج المدينه

مالي ورى بعض المواضيع مصلوح

الآدمي ما ينفعه غير دينه

لو عاش عمر شعيب وألاَّ عمر نوح

لابد ما يرحل وتقضي سنينه

مال إبن آدم غير ما خط باللوح

رزق الفتى وأجله كتب في جبينه

يامل قلبٍ من عناء الوقت مجروح

والعين من شيءٍ تشوفه حزينه

اصدور بعض الناس تغلي من الفوح

وأسبابها كثر الحسد والضغينه

أشوف وقت اليوم ما هو بمملوح

ما حس به كود العقول الفطينه

أكتم على الأسرار ما ودي أبوح

وأقول للصابر عسى الله يعينه

وأجاوب الورقاء ليا جرَّت النوح

لو كان ما أعرف في لغتها رطينه

أبكي على اللي فات والصوت مبحوح

وقتٍ مضى كل العرب خابرينه

بعض الاوادم شوفته تقصر الروح

ذبحه جريمه وإن تركته غبينه

يا راعي الغلطات ما انته بمسموح

غلطتك دايم يا أسود الوجه شينه

تبي تميدح بس ما انته بممدوح

المدح ما له في محيَّاك عينه

خلك على خلقتك يا قاصر الشوح

الطيب وهبه والمراجل قرينه

الطيب يبغى له صميدع وطحطوح

ضارٍ على كسب الفعول الثمينه

وانته تريّح واترك الوضع مشروح

مالك ركوبٍ فوق ظهر السفينه

الشاعر - سهل بن بندر المقاطي