يالله يا رب الضعوف المساكين

اللي لك المخلوق يحسن صلاته

تستر على غوشٍ صغارٍ مكفّين

أكبرهم العارف دليله عصاته

لا يا عيالي كلبوكم حبيبين

عندي وعند الناس كلٍ وذاته

عندي غلاكم يدفن الزين والشين

وعند العرب كلٍ تشاف اخملاته

يا عبيد أنا خابرك ورعن لهالحين

داوي بغبّات الجهل وظلماته

لا شك علمي لك محبة وتفطين

تسمّع الوالد وثبّت وصاته

وصاة مخلوق يعرف القوانين

ما فات عمره بالجهل والهياته

يا عبيد أنا أوصيك مني بثنتين

ثنتين هن سوّ البشر واحسناته

أوصيك لا تبحث سدود المغيبين

ولا تجهر اللي غارقٍ بغفلاته

ترى النميمة تمحق الرزق والدين

والمنزل العالي تهدْم اطبقاته

لا تحسب أن أهل الظليمة بخيتين

كلٍ يوافق ما عمل في وفاته

وأنذرك عن حق الضعيف المسيكين

اللي على حقه يهل اعبراته

ترى الضعيف اليا غدى الليل ليلين

يدعي وعند الله توافق دعاته

الظلم فإنّ الظلم يفني السلاطين

يا ويل راعي الظلم من مقبلاته

وانذرك عن ربعة رخومٍ هياسين

اللي سوالفهم بودّه وهاته

ويا عبيد الأقشر لو صفالك نهارين

نهار ثالث جاك يرفع عصاته

والله عندي ربعة الناس الأقصين

ولا صديقٍ يبلشك في حياته

ترى الرجال ابهم فهود وحياوين

جاك الكلام اللي صحيحٍ ثباته

إن كان ما تدري ترى الناس دارين

الرجل مدحه بالمجالس طراته

رجل تعلّق به رجال مسمين

عز الرفيق ولابته والحماته

ورجلٍ تشوفه جسم وعيون ويدين

ولولا الشعر ما تفرقه من خواته

كم واحد بالبيت يضرب بسيفين

وإن جا حزم كلاب قبّع عباته

مرشد البذال