لو كل وجهات الاوادم تشابه

ما شف ذا مخطي ولا شفت ذا مصيب

والرجل قصرٍ والمواجيب بابه

ولا كل من تنصاه يوفي المواجيب

وعذر السؤال اللي تعذر جوابه

الطيب يحضر بعض الاحيان ويغيب

واللي ما يكسب نعم فأول شبابه

ما تنفعه لا من غزا راسه الشيب

والزّلة اللي بالخطا تنتجابه

تلقى وراها من يشب المشاهيب

واللين مفتاحٍ لقفل الصلابه

وضحكتك في وجه امتجاهلك تهذيب

واللي ورى هفوتك يشعب ركابه

اصله على الحقران صلي اللواهيب

يمكن دوا مصيبته في مصابه

احيان في العذروب طب العذاريب

ومن لا غزا النوماس ما ينغزابه

ومن لا يسوق يساق سوق المجاليب

واللي على ربعه يكشّر بنابه

عنه اقصر الفنجال واكرب له الجيب

الطيب ماهو في خصام القرابه

الطيب خوة مكثرين التراحيب

واللي يشيّل حيته في جرابه

من نابها يشرب ذحاح المشاريب

واللي بحبل الصدق وثّق زهابه

له في تعاليل النشاما مناديب

والشك زايل والكتاب انقرابه

من قدّم البيضا قطف زهرة الطيب

والطيب مرقابٍ نبيه ونهابه

ولا كل قرناسٍ يروم المراقيب

والمرجلة رحلة والامال غابه

يحوفها فجر الطموح ومسا الغيب

ولو كل وجهات الاوادم تشابه

ما شفتني مخطي ولا شفتك مصيب

نايف المطيري