لا والله الا راح من نجد مفقود
غيبة دهر ما بين يومٍ وليله
فجيعة من عظمها يبست كبود
فوق الشهر بالقلب مثل المليله
كن اللسان من الحزن صار معقود
حزنٍ دهانا جمع جيشه وخيله
نايف فقيدتنا ذرا كل مضهود
لو هو رحل تبقى أعماله جليله
يسقيك يا ديار الحرم برق ورعود
بأمر الله المعبود مكرم نزيله
حضرت في يومه وهو يوم مشهود
في جانب الكعبه وعيني تخيله
واقفت جنازة كاسب الطيب للحود
وغير الدعاء ما عاد عندي وسيله
واقفيت وسط جموع واجناس وحشود
ضاق الصدر ودموع عيني هميله
والرب ما بابه عن الخلق مردود
ادعوا معاي وكلنا ندعيله
بشهر رمضان اللي به عباده سجود
منزال نايف بالجنان الظليله
يالله عساه بجنةٍ مالها حدود
بانهارها ينعم ويسقيه سيله
طوال عمره للحرم يبذل جهود
يجزاه رب الكون منجي دخيله
وعسى عدوه في جهنم لها وقود
وهو حي ملعونٍ أبو سلسبيله
والحمد لله باقي عقبه عضود
ادناهم اللي بالوصايف مثيله
أبو فهد سلمان هو راعي الجود
حاكم حكيم مرقبٍ بالطويله
واحمد زها المنصب وما دام موجود
حلّال وضع اللي وصل يشتكيله
مبايعين ودونهم درع وجنود
الكل منهم وان دعانا نجيله
ونايف معقّب مثله اشبال واسود
هم الخلف ريف الديار المحيله
سعود راس العز يا نعم بسعود
وجه السعد راع الكفوف النبيله
وحبل الامل بمحمد اليوم معقود
امن الوطن كساب علم النفيله
وذي حالة الدنيا وما احدٍ له خلود
لكن ترى نايف فجعنا رحيله
في غيبته كن الفضا صار مسدود
ساكت وقلبي ما يبطل عويله
لو ينجبن البيض مليون مولود
يبقى اسم نايف نادر بكل جيله
الشاعر: مشعل بن قيقان الجبوري العنزي
