مسكين ياللي غير الوقت مبداه
يجمع جنيهات الذهب في عباته
يركض ورا الدنيا يدور سواياه
وياقع على شكله ويلقى سواته
حتى ايش لو انه مع الناس تلقاه
واعوانه اللي تشتكي من رداته
همَّه ريالٍ صافطه وسط مخباه
وما يشبع الطماع زود اعشراته
هذاك والله ضايع وزل من ماه
ومن غفلته يمكن ينسى صلاته
واللي شكر ربه على كل ما جاه
الله يبارك له ويسعد حياته
هذاك يا طيبه ويا طيب يمناه
وفعل الوفا والطيب من واجباته
ومطبقٍ دينه والفرض صلاّه
وما يجحد المعروف من طيب ذاته
يالله ياللي تعلم الحال يالله
تفرج على عبدك وتبسط غناته
الشاعر - ماجد أحمد عبد الله الثميري - المجمعة
