سميت بك يامن تمسكت بسماك

يامن له العبد التقي ساجدٍ له

ياللي إلى ضاقت على العبد ينخاك

وإن ما رحمته ما حدٍ فازعٍ له

عسى هل العادات والجود بحماك

كل اجودي تابعٍ عادةٍ له

عوايد الأجواد ماهيب تخفاك

سلم الجدود ووارثه مستحلّه

ترى طويل الهرج وان طال عنّاك

كل قدايم والده يشهدٍ له

والناس كل دون عانيه شرواك

كل كسب من سمعته ما حصل له

عنابر الاجواد ذربين الاسلاك

ما شفت من قولٍ جميلٍ تحله

كان الزمان بمشكلاته تحدّاك

عنّز لمن فك الحسب ضاري له

خص السدارى قوم ادناك بادناك

رجالهم يشفيك عن كل غله

ليا من واحدهم تكلم بدعواك

ترى كثيرات الحقوق يهفن له

هم ماكرٍ طيره لياهد عشاك

روس الجبال النايفه ماكرٍ له

ياللي خذيت من التعابير فتواك

دربٍ يدلونه هل العرف دله

اسمع تعابير هدفها تمثناك

من مصدرٍ شرحه على طيب مله

يا ابن السديري شرفتنا وصاياك

خطبٍ كبيرات العقول اسطبن له

شفنا ختامك يا محمد ومبداك

وازتني العبرات يوم استهله

يا أمير ظلمانا تسفّر بقمراك

من كان نورك يشمله مسفرٍ له

بغيت في رد الرسايل مواساك

مير القمر ما ينّسب للاهله

ان كان انا بالرد عندي تمساك

ابن السديري ما براسي نزل له

الموجب انا بالتواضع شكرناك

ان الوفي فعل التواضع وفاً له

شكرت معروفك وانا مقدر اجزاك

ما اقدر جزاك ولا بعد قادرٍ له

جزاك من عندي بياضٍ تغشلاك

هذا جزى من لا قدرنا جزاً له

يالصاحب اللي كل الأوصاف تزهاك

فعل الوفا هو والذكا لايقٍ له

الصاحب اللي سمعته ما بها شكاك

لي الشرف وان كنت أنا صاحبٍ له

أنا صحيبي مثل أبو زيد وهناك

اللي شريفات الطبايع هوى له

لو نتّبع صفحات مجدك لقيناك

زبنٍ لمن صعب الأمور التواً له

يا ممن الخايف ترى أصغر سواياك

مثل الحبيل (1) اللي تراك افرجٍ له

خلصت مشكلته بمالك ويمناك

محيت عنه الغرم والجرم كله

ماهو كثيرٍ من محمد إلى انجاك

أحمد صبي الملزمه قاعدٍ له

والتاليه شف ما ترى لا عدمناك

أمرك يتمثلني وأنا طايعٍ له

ما فات يومٍ خاطري ما تمناك

مثل الغريب اللي تمنى هلٍ له

حنا نباشر بالدواوين طرياك

طاريك يا فرز الوغى ما نملّه

طال الزمان ولا توالمت وياك

مضيت كل الوقت بخذه وخلّه

لا بد من يومٍ على خير ننصاك

متى الظروف المنتوي يسمحن له

خص الرفيق اللي يخصك وياراك

حقٍ عليك زيارته في محلّه

يا عز من هو ساعة الضيق ينخاك

ليا من كلٍ طب لعيون خله

جتنا مكاتيبك وجتنا هداياك

مثلك تراني بالوفاء شاكر له

وليا حضر عندك مجالي سمعناك

في جانبي عن كل عم يخله

هذا تواضع منك من طيب مجناك

من رابع الطيب نزل منزلٍ له

الشاعر/ مرشد البذال - رحمه الله -

* (1) الحبيل: اسم شخص.