يا هاجسي وراه ينضب معينك
أنا أدري بحزنك مع حزنك أحزان
ومن مات سلطان الكرم فاقدينك
ولا كل فقدان يسمى بفقدان
أرجوك هذي حزتك يا ظنينك
عبّر عن أحزاني ترى الوقت قد حان
يا سيدي سلمان الله يعينك
ويعظّم أجرك في ذرى الدار سلطان
أنا أدري أنه راح روحك عوينك
نبع الصخاء مروى ظما كل عطشان
منّاب والله يالوفي لايمينك
في حب من تنعاه حضر وبدوان
يبكيه طفل قال وين أنت وينك
وين أنت يا سلطان يا ذرب الايمان
ويبكيه شعب قايل أني ضمينك
تعيش حر وتفتخر بين الاوطان
في ظل أبو متعب يدينا يدينك
حنا جنوده وان غشا الجو دخان
مليكنا آمر وحن سامعينك
ارواحنا تفداك في سر وإعلان
نايف ولي العهد ومبايعينك
ويبقى لنا نايف على طول الأزمان
يا سيدي سلمان الله يعينك
ويعظم أجرك في ذرا الدار سلطان
يا سيدي الله يمدّ بسنينك
رمز الوفا كل الوفا يا كحيلان
ماهوب أنا كل الملا خابرينك
أصبر من الصّم الصفا يا بليهان
يا شيخ نجد وكلنا في يمينك
اضرب بنا سيف عل كل خوان
يا سيدي ونيننا من ونينك
فينا وتسلم يا ابيض الوجه سلمان
ماجد بن حسن آل ناهش الدوسري
