إلي ثمان أيام والسهر في زود

والنوم في جفني حصل له بدايل

أطلب عسى الله كل ما هبت النود

إنه يعدّل بالدعا كل مايل

نشدتني عن ضيقة الصدر يا سعود

قلت البلا فقدة كريم السبايل

خبر وفاة الفيصلي منتهى الجود

سلطان أبو خالد عديم الخصايل

الله يشهد له وخلق الله شهود

من حافة السودة ليا جبال حايل

واللّي ورا مكة وضلعانها السود

حتى ورا الخرخير حد النثايل

حتى الدول تشهد صوادير وورود

كلٍ يجي ويروح والهم زايل

تاريخٍ أبيض في السجلات مجرود

شيخٍ فعوله مثبتتها الدلايل

والله ما مثله على الارض موجود

في بذل ماله في عطى كل سايل

ما ينشده متى يجي منه مردود

فعلٍ عظيم وبين الأجواد هايل

عد على ما قيل للناس مورود

ومزبن لمن وقته عليه متمايل

وحنا رفعنا البيض ونقول محمود

قد نالنا منكم عظيم الفضايل

مرحوم يا عود سكن في ثرى العود

وخّر حرار نادرات الفصايل

الله يرحم من سكن منهم لحود

ويوفق الحيين لأزكى الشمايل

الشعب في راحة وفي خير وسهود

ما همنا في الناس من كان قايل

وصلاة ربي عد ركاع وسجود

على محمد خاتم للرسايل

رابح بن ماطر ضيف الله العتيبي