خافقي ساعة ونبضاته عقارب

والليالي سيف والأيام حربة

والزمن مثل البحر والحظ قارب

والقدر مجداف والأمواج غربة

والمنايا كاس كلٍ منه شارب

والجسد تربه يبي يرجع لتربة

والبشر أشكال وأطباع ومشارب

انجبر بالبعض والبعض أنكسر به

والعنى في داخل الأعماق ضارب

جيته بسلمي وهو جاني بحربه

كل ما صلحت شيء ألقاه خارب

ليت لك يا حظ عذرٍ تعتذر به

آه من جفنٍ لحلو النوم حارب

ما يمره ليل حزن إلا سهر به

وآه من همٍ معي آكل وشارب

بادعٍ بين الضلوع العوج دربه

من خفوقٍ ما تعلمه التجارب

مانحٍ كل الثقة للي غدر به

الجدايل تخدعه قبل الشوارب

ألف طعنة في صميمه وألف ضربة

طايحٍ بين الأباعد والأقارب

ما بهم من قال يا عطشان شربة

جرّب امن الناس مستعرب وعارب

ما مشى له مع طريق إلا عثر به

دايمٍ وأقوالهم فيها تضارب

لو ألِفّ الكون من شرقه لغربه

وين ابلقى صاحبٍ ماله مآرب

بالشدايد ثابت ويمناه ذربة

لي متى وأنا من الأقدار هارب

والعنى بعده بعيني مثل قربه

طالبٍ رب المشارق والمغارب

يرأف بحالي ويفرج كل كربة

الشاعر- سليمان الغفيلي - بريدة