الطيب مثل المسك فوّاح ريحه
والشين فعله للفشيله يجرّه
قلب الوفي مثل الفيافي فسيحه
واغلى من الالماس مليون مره
بعض البشر لاطاح ما اصعب مطيحه
وبعض البشر لاقام لله دره
مافيه نفس من العنا مستريحه
والوقت ما يامن بخيره وشره
لاتامن الايام خذها نصيحه
واحذر تطيع النفس في كل مره
قلته وانا من زود همي جريحه
من اقرب الغالين جتني مضره
من باعنا بعناه ربي يبيحه
ومن عزنا بالطيب عيني مقره
دره ولكن بالمشاعر شحيحه
وثوب المعزه من شموخي اجره
صحّى سكون الليل بالصدر صيحه
يومٍ غشتني عتمته باح سره
ذاك الغلا بالقلب هز القريحه
وطاف الكواكب مع نجوم المجره
وكل الحروف الابجديه الفصيحه
ما تلحق وصوفه ولو راس ذره
لاماه عطر الروض لامال شيحه
يحضن شعورٍ تل قلبي وجره
يامن ملكت القلب لا تستبيحه
خلك كريم ودوم صونه وبره
عريبة الجدين تدرا الفضيحه
الا على الغالين غيمه مْدرّه
الشاعرة- فجر المطيري
