لا يا غلا لا تقولين الشعر هاته

الشعر ما هو قضية بينك وبيني

الشعر لجلك يهون وترخص ابياته

وأنا اكتبه قبل ما يعنيك يعنيني

لو شفتي أنه بشخصك طول سكاته

هذا علاشانك أكبر منه في عيني

انتي رقيقه مشاعر والشعر ذاته

ما يمكن ارضيه في وصفك ويرضيني

والشعر لك يا هوا الشاعر ملذاته

وأنا اتجرع شقاه ولا يواسيني

لو شفتي احلى المعاني بين طياته

تراى اخفّي بشعري لوعة سنيني

ما نيب شاعر يراضي به حبيباته

هي وحده وضاعت وضاعت عناويني

عزيزتي جرحي الدامي معاناته

هانت بشوفك وقرب منك يشفيني

يوم الملا شفتهم بالعين شمّاته

شفتك معي لين جيت انهار شلتيني

لك الفضل يا قصيدي واجمل ابياته

يا من معرفتك بعد الياس تحييني

وآخر وصاياي لك قلبي ولوعاته

ابكيه لومات مما فيه وأبكيني

الشاعر/ فهد السياري