يا أبونا تقول إكرامكم ما عنه مجناب

وحنا شفاك نشوفه أعظم مكارمنا

بعد صرت طيّب يا بو متعب وطنّا طاب

وأقمنا احتفالاتٍ إكبار وتعازمنا

قبل تلقي إخطابك ومسكنك في الأهداب

لانك يا بو متعب من سنين مكرمنا

محبتك فطريه من الواحد الوهاب

مع الوقت زادت وأصبحت من معالمنا

سكنت القلوب وفاحت بحبك الأطياب

لحد الصدور اغتارت إجهاتها اليمنى

يا أبونا ولانا للوطن عهد في الأرقاب

هذا اللي عليه الدين أمرنا وعلمنا

وإذا الفيس بوك اللي يديرونه الأغراب

يحاول يزعزعنا بدجله ويوهمنا

فحنا شباب الوعي والعلم والآداب

صفعناه في خدّه ودسناه بأقدمنا

وعطيناه درس أصبح منه حاير ومنصاب

تزيد الشدايد ويتزايد تلاحمنا

وقلنا له إن الشعب يفنون لجل تراب

ترى أطهر ثرى لجله ملينا محازمنا

يا بومتعب عيالك صقورٍ وراك أسراب

نجي من وراك اصفوف قدام تزهمنا

اتدندن قبايلنا ليا دندن الحرّاب

نبيد العدا ونهين روسٍ تصادمنا

وإذا قيل عنّا موطن البدو والأعراب

نقول الفخر في ديننا اللي امعظمنا

نهلنا العلوم وصار يحسب لنا ألف حساب

وصلنا النجوم بدون ما نترك اقيمنا

وأخذنا الصدارة لجلنا من هل المحراب

أجل ليش محسودين لولا تقدمنا

حفظنا لموروثٍ دخلنا به أوسع باب

وعن التقنية ومواكب العصر ما نمنا

لبسنا العمايم والعقل ما لبسنا الكاب

إي والله ونفخر في شعارٍ ملازمنا

جمعنا ما بين العلم وأصالة الأنساب

والأخلاق والعزّه وشرعٍ إمنظمنا

يبا يعجز العالم لو يغذّي الإرهاب

يزعزع مكانتنا وقوة تفاهمنا

بقى بيت واحد يعجب الذوق والألباب

فريد وجديد وفيه تقوى عزايمنا

وطنّا منابر للثقافة وللآداب

وطنّا مقابر للعدا اللي تهاجمنا

الشاعر: راجح المغيري