لك جزيل الشكر يا رب العبادي

مثل ما تنعم بالافضال الكثيره

تو ما لاح السعد والكيف زادي

والفرح بعد الكدر جانا بشيره

بعد ما ربي كتب حكمه ورادي

نحمد الله هان الأمر وجات خيره

سلم الله راعي الفعل الريادي

المليك اللي ظفى للشعب خيره

صوب داره من بعيد الدار عادي

واستصح وصارت الدعوى يسيره

ذاك والله شيخنا سقم المعادي

نادر ما تهتوي الأمجاد غيره

ابو متعب راعي الراي السدادي

نعم والله قايد قاد المسيره

ما اهتنينا يوم غاب من البلادي

كنها عقبه لنا ما هيب ديره

نحمد الله كن حنا في عيادي

دايم طربين والفرحة كبيره

وله نزف اسمى التهاني والوكادي

ان حب الناس ما حدٍ يستعيره

شاهده شي حصل ما هوب عادي

المطار اكتظ بجموع غفيره

قومهم غير الولا طيب المبادي

في محبة حامي الدين ونصيره

الزعيم اللي لشرع الله ينادي

نادر حلي على صقر الجزيره