قصيدة رثاء في الشيخ سليمان بن مبارك الظاهري رحمه الله:
ودعتك الله يا يبه يوم قفيت
يا طيب السيره رفيع المهابه
ودعتك اللي يخرج الحي من ميت
اللي له المسلم يطيل الانابه
كلن ذكرك بخير يا طيب الصيت
جيراننا واصحابنا والقرابه
أنا اشهد انك بالفضيلة تربيت
بالدين والأخلاق وأيضاً الحبابه
ما يرجع الميت كثير التناهيت
درب مشيته كل حي مشابه
يحسن عزانا فيك يا واسط البيت
عساك جار للنبي والصحابه
أخير من دنيا بها الفكر تشتيت
نتعب وراها ما نحسب حسابه
اللي حلاها ينقلب يوم حلتيت
لو تصفي أيام تكدر شرابه
محد يعد لساعة الصفر توقيت
كلن بحاجه ما تحساه بزهابه
الا أنت مؤمن مخزين كل عفريت
مرضي عظيم الملك حافظ كتابه
عساه يشفع لك اليا أصبحت وامسيت
في جنة الفردوس تلبس ثيابه
وصلاة ربي عد من حج للبيت
على نبي سيرته يقتدانه
عجمي بن سليمان الظاهري /بريدة
