يقول ضايق وليلي طايل وحالك |
أرجي دواك وكثّر الله من خيرك |
الوجد فيني غدا مجروح متهالك |
مما جرى لي وهات الحين تفسيرك |
قلت ان شكيت فحالي اليوم من حالك |
وجروح بندر سببها العام تدميرك |
الضيقة اللي تزورك حلّها وصالك |
مالومها لو لازمت بالك وتفكيرك |
لو كان غيرك رضى بالضيق ما جالك |
ما كان ضايق حلاك وضايقه غيرك |
لا تشكي الضيق منتب ضايق لحالك |
وش عاد لامن غدا من مامعه طيرك |
البير شحّت بماها زهّب رحالك |
لا لا تهايق تراها أملحت بيرك |
وش عاد ترجى إلى غنّيت موّالك |
ما ينفع الدرب وانت اخطيت في سيرك |
أقول.. تدري لو ان الضيق لأمثالك |
صحّى ضميرك.. قدر ينجح بتذكيرك |
كان التقت أحلام عمري مع آمالك |
تعال.. ارجع.. ولا احتاج تبريرك |
بس الكدر ما جا لصدرك غير بافعالك |
الراي رايك والتدبير تدبيرك |
بندر محمد الحمودي- عنيزة |
|
