هذه المرثية في الشيخ محمد بن زايد النخيش مؤسس مدينة البجادية ورئيسها السابق.. رحمه الله وأسكنه فسيح جناته:
|
عسى سحابٍ على البيداء يهل برده |
ينثر على قبر ابن زايد ويسقى ثراه |
شيخ بفعل المراجل دوم تندى يده |
شامخ شموخ الجبل حيدٍ يذري ذراه |
ياسعد من جاه يشكي ضيقته ونكده |
ما يراجع الا لزومه بامر ربه قضاه |
ما ضاق من كان في الشده يصير سنده |
يبشر بمطلوبه اللي في اللوازم نصاه |
طيبه يوصي به المولود ولد ولده |
لاحل جيلٍ ذكر طيبه لجيل وراه |
صلى وصام وتزكى والاله اعبده |
ولافيه مخلوق جاء يشكي فعايل خطاه |
الله يوسع له القبر وينير لحده |
ويغفر ذنوبه ويكتب له بشاير رضاه |
تبكيه سجادته والمصحف ومسجده |
وربوعه وديرته بالدمع كل رثاه |
لو فارقت روحه الدنيا وغاب جسده |
ماكنه إلا بطيب الذكر فوق الحياه |
يالله من عفوك ولطفك وسترك زده |
واجزه بالاحسان حسن وسامحه عن خطاه |
وليا بعثته بيوم الحشر من مرقده |
تصير جنتك يالمعبود هي منتهاه |
ابو فهد ياكثر ناس تبي تفقده |
لأنه عوين الذي همه يزلزل حشاه |
بس الامل في الرجال اللي تحل بعده |
تنهج مناهيجه وتمشي طريق مشاه |
عياله اللي تولوا بالوصاه بلده |
الكل منهم عسى ربي يسدد خطاه |
مشعل بن شباب الشيباني |
|
