يا هاجسي ما عاد للصمت داعي |
ولعل في هيض المشاعر وناسه |
من تالي قامت تغيّر أطباعي |
مدري خضار القلب والا يباسه |
العام لقيت الهبايب شراعي |
وخالفتها في حومة الموج راسه |
وثبت فوق الموج على ارتفاعي |
واشوف غيري قومة وانتكاسه |
واليوم ركب الموج موج صناعي |
وداس البحر من طول عمره ما داسه |
ما باقي إلا أمات دفع رباعي |
تاطا البحر وتجيب دره وماسه |
والا السمك يدخل جحور الأفاعي |
والضب في الجمة يبعد مراسه |
لولاي أحب التسليه واجتماعي |
وأهوى الخلا بالحيل وأحب ناسه |
وأحس وآداري وأقدر وآراعي |
وأعطي على ما قيل كلٍ مقاسه |
لا قول ما للصمت يا ناس داعي |
وعلم التجارب غير علم الدراسه |
علي بن ثابت القحطاني |
|
