يا مل قلبٍ هواجيسه يسجنه |
سج النضا بالمطارق والمشاعيبي |
هن ودهن كل روضٍ زين يرعنه |
وهم ودهم بالمساعن المعازيبي |
يوم انتهى كل ما بالخرج والشنة |
تواعدوا بيت نطاح المواجيبي |
شيخٍ صدى صوت نجره كل ما دنه |
يقنب بروس النوازي قنبه الذيبي |
يرخص خروفه ولا يبخل على بنه |
ويشكر ويذكر ليا عدوا هل الطيبي |
تريحن وأمرحن يوم انهن جنه |
وأنا الهواجيس تسرح بي وتسريبي |
راحن بقلبي ولا ادري وين ودنه |
اخذت في جوهن غفوة وتغييبي |
سجيت معهن على فلمٍ يعرضنه |
عن غيب بعض القرايب والاصاحيبي |
ابليس لولاه كل الناس بالجنة |
لكن يلعبنا راع التلاعيبي |
يا شين بعض الاوادم لو ضحك سنه |
يضحك بوجهي ويشذب في عراقيبي |
واللي ليا غبت غوجه للطرد عنه |
وجرد سيوفه عطيبات المضاريبي |
هجرت كل الدروب اللي يمرنه |
اخير لي من مجيه، عنه تجنيبي |
ولو ما اقتدي في كتاب الله والسنة |
خليت كلٍ على دينه يصلي بي |
عبدالله بن زويبن |
|
