كل مخلوق بالدنيا مداه الفنا |
لا يغرك صفا دنياك واقبالها |
الفنا منتهاها ما وراها هنا |
لو صفت وقت ما دامت على حالها |
من وفت مدته منها ويومه دنا |
المنية تجيله كان ما جالها |
ما تخلي كبير ولا صغير الضنا |
وتاخذ أم العيال وتترك عيالها |
راح منا الكثير وراح من قبلنا |
ومن بقى ما وقف يومه على بالها |
راحوا أحبابنا الغالين وأجدادنا |
أفنت أسلافنا الماضين وأجيالها |
ما تجي لو بغيناها على ودنا |
أم وجهين بقعا ما عرفنا لها |
يوم تصبح عبوس ويوم تضحك لنا |
هكذا طبع دنيانا وموالها |
لو تزخرف لأهلها تاليتها العنا |
من غثاها تكدر صافي زلالها |
فرقت من بها طول الحياة خدنا |
القلوب الولايف تقطع آمالها |
عارفين النهاية موتنا كلنا |
نفوسنا اللي خلقها قدّر آجالها |
واهني من كسب فيها رضا ربنا |
يوم تجزى جميع الناس بأعمالها |
|
