تباشري يا المملكة قام سلطان |
تباشري به يا قصور اليمامة |
ويا نجد برق(ن) لاح في عرض الامزان |
تباشري به يوم ركب غمامة |
واسترسلي في شيل عذبات الألحان |
الحمد للي قومه بالسلامة |
هذا ولد من حط للمجد عنوان |
سليل من أسس ركون الزعامة |
سلامته عيد(ن) على أرض الوطن حان |
والحزن راح وبدد الله ظلامه |
ونور الفرح شعشع على كل الأوطان |
شرق وشمال وغرب وأقصى تهامة |
منتب رخيص(ن) يا سلايل كحيلان |
غالي ولك قدر(ن) رفيع(ن) مقامه |
أنت السخاء والجود يا ذرب الأيمان |
جودك على خد الزمن حط شامة |
يشوفه المبصر ومن كان عميان |
ويدري به اللي دوب كمّل فطامه |
وصيتك تعدى الكون من غير بهتان |
لك هامة بالعز ياويّ هامة |
واسمك إلى من مر تحتار الأذهان |
يفرض على كل الشعوب احترامه |
يا فزعة اللي هانه الوقت وانهان |
يا عون من هو جاير الوقت ضامه |
يا درعنا عقب الولي عالي الشان |
يا حزام من قطّع زمانه حزامه |
الشعب يرقب طلتك حيل شفقان |
يا من يروم المجد والمجد رامه |
والشكر للي فارض(ن) خمس الأركان |
له الفضل في قومتك بالسلامة |
الله يحفظه من صواديف الأزمان |
لاباس يا راعي الوفاء والشهامة |
عبدالله بن سعود الدغيثر – ضرما |
|
