يا مسرف بي لا متى هالتمادي
|
حيرتني مدري وش اللي تريده
|
كم ليلة علقت عيني سهادي
|
ودورت بك صبح نجومه بعيده
|
دون البياض وفي حدود السوادي
|
له صورة بمخيلاتي فريده
|
وأضيع بك وأقول ماني بغادي
|
ما كل الأريا اللي تريح سديده
|
المقفيات المقبلات العوادي
|
تلعب بحال ما بقى له شريده
|
ما كن حاديني من الوقت حادي
|
وهجس حياي وشيمتي ثنو قيده
|
سهل جنابي بس صعب انقيادي
|
رغم الظروف القاسيه والعنيده
|
الجرح لا منه جفاه الضمادي
|
خله يخالط نزف دمه صديده
|
وانثر على قبره من الورد كادي
|
كرامة الرجال مثل العقيدة
|
بدر بن ماجد بن ربيعان |
|
