هناك قصائد للشاعر عدوان الهربيد السويدي نادرة وغير متداولة مثل قصيدته في إسماعيل وسعيد التي لا يعرف عنه الكثير سواها ولكن الراوي المعروف عبدالرحمن بن سعود المرشدي روى له كثيراً من القصائد النادرة في تسجيلاته الصوتية التراثية وسوف نورد بعضها في هذه الزاوية لأن أغلبها ذات قوة ويغلب عليه طابع الحكمة وفيها الكثير من صور الصحراء ومنها قوله مفضلا الإبل على الغنم:
|
التايه اللي صار مثلي مع الضان |
ما يتبع الضينان كود العفوني |
طالعت انا المجمول مردوع الاوجان |
العصر قرب للقطيع الضعوني |
اجزل عطايا الله مجانيس الالوان |
عوج الرقاب مرفعات المتوني |
ماهن رخاص ينصخي به للاخوان |
لولاه تبلي صاحبه بالغنوني |
عذروبها الغييب شينين الالوان |
اللي يجازون الولد بالطعوني |
من فوق حيل ضاريات للاقران |
رث الحبال ويابسات الشنوني |
عز البهيجات عطبين الاطعان |
لباسة الجوخ الحمر والزبوني |
قادت لنا المربوب والسعن مليان |
والعصر حشوانه على الما عطوني |
|
ابا اتمنى منوة الكيف واختار |
لو كان لي تجي التماني على فوش |
شفي ثلاث مركيات على النار |
سود الخوافي فوقهن تقل طربوش |
واسطر غريب باللحن يدعي الجار |
كما ينادي جند الاورام شايوش |
مع زرقننا ما يتعبه كل ما دار |
زرقا قفاه لواهج الجمر مفروش |
ومولف يبعد يمينك عن الحار |
يشدى لعنق الديك والخشم مقطوش |
مع قطمنا تبكي على كل صبار |
تنثر دموع وتمحش الدمع بقروش |
مثل الهنوف اللي من الغوش تختار |
ما تاخذ الا مرخص العمر بالهوش |
وخمسة جروس من حسن كل ما صار |
ما هي سعيره مع سعيره قراقوش |
صبه على اللي ما يغالون الاسعار |
لو عاضبت يشرونها بقرح البوش |
واثنه على اللي لاغشا الزمل تندار |
يروون عند قطيهن كل مرعوش |
وصينية تجله سريعه بالاديار |
عليها من لحم المغاتير قنطوش |
مع حايل تندا عظامه على الدار |
وحب اللقيمي بابيض الصفر مرشوش |
يا محلاها مع طرف كل مسيار |
يا صار مالك يا فتى الجود لا بوش |
حلو قبلهن عند ملفى هل الكار |
حلو قبلهن مع نبا كل هشهوش |
وكثره وقله عند علام الاقدار |
صياد باسباب القدر كل منحوش |
|
